nigar-e-fan pe harifan-e-sher ki yalghaar

nigār-e-fan pe harīfān-e-sher kī yalġhār

niyām-e-harf kahāñ hai ḳhayāl kī talvār

rahīn-e-marg-e-tamannā thī kāmrānī-e-vasl

jhulas gayā hai mujhe qurb-e-sho.ala-e-ruḳhsār

havā kuchh aisī chalī dasht-e-nā-murādī se

ujaḌ ke bas na sake phir kabhī diloñ ke dayār

kaḌaktī dhuup meñ ab aur kis jagah baiThūñ

simaT ke ban gayā dīvār sāya-e-dīvār

jalā ga.ī hai mirī aag pairahan merā

maiñ kyā gila karūñ tujh se charāġh-e-mahfil-e-yār

zarā rasā.ī-e-manzil-gah-e-murād to dekh

chale the shahr-e-vafā se pahuñch ga.e sar-e-dār

ye kis ne sard gulistāñ kā zikr chheḌā hai

nikhar chalā hai nigāhoñ meñ paikar-e-qad-e-yār

ye kis jazīra-e-be-rañg-o-bū meñ baste haiñ

na tā.irān-e-ajam haiñ na āhūvān-e-tatār

ye kaun guzrā hai 'mohsin' ḳharāba-e-dil se

ki uḌ rahā hai har ik samt hasratoñ kā ġhubār

nigar-e-fan pe harifan-e-sher ki yalghaar

niyam-e-harf kahan hai KHayal ki talwar

rahin-e-marg-e-tamanna thi kaamrani-e-wasl

jhulas gaya hai mujhe qurb-e-shoala-e-ruKHsar

hawa kuchh aisi chali dasht-e-na-muradi se

ujaD ke bas na sake phir kabhi dilon ke dayar

kaDakti dhup mein ab aur kis jagah baiThun

simaT ke ban gaya diwar saya-e-diwar

jala gai hai meri aag pairahan mera

main kya gila karun tujh se charagh-e-mahfil-e-yar

zara rasai-e-manzil-gah-e-murad to dekh

chale the shahr-e-wafa se pahunch gae sar-e-dar

ye kis ne sard gulistan ka zikr chheDa hai

nikhar chala hai nigahon mein paikar-e-qad-e-yar

ye kis jazira-e-be-rang-o-bu mein baste hain

na tairan-e-ajam hain na aahuwan-e-tatar

ye kaun guzra hai 'mohsin' KHaraba-e-dil se

ki uD raha hai har ek samt hasraton ka ghubar