nigar-e-mah-wash o mahbub-e-lala-ru ki tarah

nigār-e-mah-vash o mahbūb-e-lāla-rū kī tarah

koī to raat mire ḳhvāb-e-ārzū kī tarah

charāġh-e-shām-e-tamannā kā rañg kyā kahiye

laraz rahā hai kisī harf-e-ārzū kī tarah

shaguft-e-gul kā tabassum bhī harf-e-dilkash hai

magar kahāñ tire andāz-e-guftugū kī tarah

bahal hī jā.egā dil niind aa hī jā.egī

havā to de koī dāmān-e-mushk-bū kī tarah

ḳhulūs-e-ishq hirāsāñ hai ahl-e-duniyā se

kisī ġharīb ke ehsās-e-ābrū kī tarah

hamāre fan kā har ik naqsh be-sila ab tak

ḳhamosh hai kisī māsūm ke lahū kī tarah

ḳhizāñ kā maqtal-e-hasrat bhī dīdanī hai 'shamīm'

paḌe haiñ phuul shahīdān-e-surḳh-rū kī tarah

nigar-e-mah-wash o mahbub-e-lala-ru ki tarah

koi to raat mere KHwab-e-arzu ki tarah

charagh-e-sham-e-tamanna ka rang kya kahiye

laraz raha hai kisi harf-e-arzu ki tarah

shaguft-e-gul ka tabassum bhi harf-e-dilkash hai

magar kahan tere andaz-e-guftugu ki tarah

bahal hi jaega dil nind aa hi jaegi

hawa to de koi daman-e-mushk-bu ki tarah

KHulus-e-ishq hirasan hai ahl-e-duniya se

kisi gharib ke ehsas-e-abru ki tarah

hamare fan ka har ek naqsh be-sila ab tak

KHamosh hai kisi masum ke lahu ki tarah

KHizan ka maqtal-e-hasrat bhi didani hai 'shamim'

paDe hain phul shahidan-e-surKH-ru ki tarah