nigar-e-subh-e-daraKHshan se lau lagae hue

nigār-e-sub.h-e-daraḳhshāñ se lau lagā.e hue

haiñ apne dosh pe apnī salīb uThā.e hue

guzar rahe haiñ dabe paañv vaqt kī mānind

farāz-e-dār pe apnī nazar jamā.e hue

sila mile na mile ḳhūn-e-dil chhiḌakte chaleñ

har ek ḳhaar hai dast-e-talab baḌhā.e hue

vo ab bhī sāya-e-abr-e-ravāñ ko takte haiñ

jinheñ zamāna huā apnā ghar jalā.e hue

chhalak sakā na kabhī jām-e-chashm-e-tar 'mohsin'

agarche umr huī ham ko gungunā.e hue

nigar-e-subh-e-daraKHshan se lau lagae hue

hain apne dosh pe apni salib uThae hue

guzar rahe hain dabe panw waqt ki manind

faraaz-e-dar pe apni nazar jamae hue

sila mile na mile KHun-e-dil chhiDakte chalen

har ek KHar hai dast-e-talab baDhae hue

wo ab bhi saya-e-abr-e-rawan ko takte hain

jinhen zamana hua apna ghar jalae hue

chhalak saka na kabhi jam-e-chashm-e-tar 'mohsin'

agarche umr hui hum ko gungunae hue