nigar-KHana-e-bazm-e-jahan ki baat karo

nigār-ḳhāna-e-bazm-e-jahāñ kī baat karo

sharāb-o-sabza-o-āb-e-ravāñ kī baat karo

qafas ke daur meñ ḳhatm āshiyāñ kī baat karo

yahīñ guzartī hai ab to yahāñ kī baat karo

zamāna sun ke hañsī meñ uḌāne vaalā hai

kisī se ab na ġham-e-bekarāñ kī baat karo

hameñ bahār nahīñ aatī raas ahl-e-chaman

hamāre sāmne daur-e-ḳhizāñ kī baat karo

vo bazm-e-nāz maqām-e-sukūn-e-ḳhātir hai

to ab na shorish-e-dard-e-nihāñ kī baat karo

qafas meñ yād-e-bahār-e-chaman to karte the

chaman meñ ātish-e-barq-e-tapāñ kī baat karo

dilāo yaad na piirī meñ zo.af-e-pīrī ko

hamāre sāmne azm-e-javāñ kī baat karo

mirā ḳhayāl lagātā hai chaar chāñd us ko

bayān-e-husn meñ husn-e-bayāñ kī baat karo

haram bhī dair bhī hai mai-kada bhī hai 'ḳhushtar'

jo raas aa.e tumheñ us makāñ kī baat karo

nigar-KHana-e-bazm-e-jahan ki baat karo

sharab-o-sabza-o-ab-e-rawan ki baat karo

qafas ke daur mein KHatm aashiyan ki baat karo

yahin guzarti hai ab to yahan ki baat karo

zamana sun ke hansi mein uDane wala hai

kisi se ab na gham-e-bekaran ki baat karo

hamein bahaar nahin aati ras ahl-e-chaman

hamare samne daur-e-KHizan ki baat karo

wo bazm-e-naz maqam-e-sukun-e-KHatir hai

to ab na shorish-e-dard-e-nihan ki baat karo

qafas mein yaad-e-bahaar-e-chaman to karte the

chaman mein aatish-e-barq-e-tapan ki baat karo

dilao yaad na piri mein zoaf-e-piri ko

hamare samne azm-e-jawan ki baat karo

mera KHayal lagata hai chaar chand us ko

bayan-e-husn mein husn-e-bayan ki baat karo

haram bhi dair bhi hai mai-kada bhi hai 'KHushtar'

jo ras aae tumhein us makan ki baat karo