نگار خانۂ بزم جہاں کی بات کرو

نگار خانۂ بزم جہاں کی بات کرو

شراب و سبزہ و آب رواں کی بات کرو

قفس کے دور میں ختم آشیاں کی بات کرو

یہیں گزرتی ہے اب تو یہاں کی بات کرو

زمانہ سن کے ہنسی میں اڑانے والا ہے

کسی سے اب نہ غم بے کراں کی بات کرو

ہمیں بہار نہیں آتی راس اہل چمن

ہمارے سامنے دور خزاں کی بات کرو

وہ بزم ناز مقام سکون خاطر ہے

تو اب نہ شورش درد نہاں کی بات کرو

قفس میں یاد بہار چمن تو کرتے تھے

چمن میں آتش برق تپاں کی بات کرو

دلاؤ یاد نہ پیری میں ضعف پیری کو

ہمارے سامنے عزم جواں کی بات کرو

مرا خیال لگاتا ہے چار چاند اس کو

بیان حسن میں حسن بیاں کی بات کرو

حرم بھی دیر بھی ہے میکدہ بھی ہے خوشترؔ

جو راس آئے تمہیں اس مکاں کی بات کرو