nigar-KHana-e-duniya bhi hai ajib-o-gharib

nigār-ḳhāna-e-duniyā bhī hai 'ajīb-o-ġharīb

ḳhushī kisī kā muqaddar kisī kā ġham hai nasīb

vo ik nazar jo kabhī duur ho kabhī ho qarīb

vahī bigāḌe muqaddar vahī banā.e nasīb

sabhī ko jaanā hai duniyā se farq itnā hai

kisī kī duur hai manzil abhī kisī kī qarīb

kahāñ pahuñch ke tirī yaad ne bhī chhoḌā saath

guzar chukī thī shab-e-hijr jab qarīb qarīb

nazar na aayā zamāne meñ ek bhī aisā

na jis kā koī ho dushman na jis kā koī habīb

tirī nigāh-e-'ināyat kā shukriya lekin

zarā ye dekh ki ab baḌh ga.e haiñ kitne raqīb

na chhoḌā tū ne koī ghar bhī aaj tak ai maut

tirī nazar meñ barābar rahe amiir ġharīb

na us se sāmne aa.e bane na chhup paa.e

'ajīb shaḳhs hai vo bhī na duur hai na qarīb

'ajīb daur hai 'gulshan' 'ajab zamāna hai

har ek kāñdhe pe apne dhare hai apnī salīb

nigar-KHana-e-duniya bhi hai 'ajib-o-gharib

KHushi kisi ka muqaddar kisi ka gham hai nasib

wo ek nazar jo kabhi dur ho kabhi ho qarib

wahi bigaDe muqaddar wahi banae nasib

sabhi ko jaana hai duniya se farq itna hai

kisi ki dur hai manzil abhi kisi ki qarib

kahan pahunch ke teri yaad ne bhi chhoDa sath

guzar chuki thi shab-e-hijr jab qarib qarib

nazar na aaya zamane mein ek bhi aisa

na jis ka koi ho dushman na jis ka koi habib

teri nigah-e-'inayat ka shukriya lekin

zara ye dekh ki ab baDh gae hain kitne raqib

na chhoDa tu ne koi ghar bhi aaj tak ai maut

teri nazar mein barabar rahe amir gharib

na us se samne aae bane na chhup pae

'ajib shaKHs hai wo bhi na dur hai na qarib

'ajib daur hai 'gulshan' 'ajab zamana hai

har ek kandhe pe apne dhare hai apni salib