نگۂ ناز کرے شوق سے برباد مجھے

نگۂ ناز کرے شوق سے برباد مجھے

ہے مرا ذوق نظر مانع فریاد مجھے

صورت حذف مٹا اے ستم ایجاد مجھے

لب تصویر ہوں آتی نہیں فریاد مجھے

ہائے وہ عہد تمنا وہ مرا جذبۂ شوق

ایسا بھولا ہے کہ آتا ہی نہیں یاد مجھے

ڈھونڈھتا ہوں نظر آتا نہیں اس کا جلوہ

شوق دیدار کئے دیتا ہے برباد مجھے

ہم نفس بس مری روداد تباہی یہ ہے

رحم آیا انہیں جب کر چکے برباد مجھے

ترے اقرار وفا کو وہ مرا دہرانا

وہ ترا ناز سے کہنا کہ نہیں یاد مجھے

سخت مجبور ہوں میں ضبط الم سے ثاقبؔ

خود مری آہ نہ کر دے کہیں برباد مجھے