nigah-e-shauq ko yun aaina-samani de

nigah-e-shauq ko yuuñ ā.ina-sāmānī de

ishq ko husn banā husn ko hairānī de

dil-navāzī meñ bhī iizā hai mohabbat kī qasam

tujh ko fursat jo kabhī shuġhl-e-sitam-rānī de

kuchh tirī chashm-e-suḳhan-sāz kā iimā na khulā

lab-e-mai-nosh ko taklīf-e-gul-afshānī de

phuul vo hai jo mayassar chaḌhe ye suntā thā

ab khulā dil kī rah-e-ishq meñ qurbānī de

aa.ina sañg-e-dar-e-dost huā bhī to kyā

sar jo sajde meñ jhuke lau tirī peshānī de

uf vo purkār jo sunte hī taġhāful kā gila

ishva-o-nāz ko ta.alīm-e-pashīmānī de

dil-e-betāb-e-tamāshā kī tasallī ma.alūm

apne har jalve ko ik paikar-e-insānī de

us kī añgḌā.ī kā aalam to kabhī dekh ai gul

aur hī husn tirī chāk-garebānī de

aao shīrāza-e-hastī ko pareshāñ kar deñ

yuuñ ki us zulf ko paiġhām-e-pareshānī de

terī sarkār ġhanī terā gadā bhī hai ġhanī

kuchh na de aur jo de ġham kī farāvānī de

is tavaqqo pe huuñ ḳhāmosh ki vo shoḳh-nigāh

phir Tahokā pa-e-taqrīb-e-ġhazal-ḳhvānī de

nigah-e-shauq ko yun aaina-samani de

ishq ko husn bana husn ko hairani de

dil-nawazi mein bhi iza hai mohabbat ki qasam

tujh ko fursat jo kabhi shughl-e-sitam-rani de

kuchh teri chashm-e-suKHan-saz ka ima na khula

lab-e-mai-nosh ko taklif-e-gul-afshani de

phul wo hai jo mayassar chaDhe ye sunta tha

ab khula dil ki rah-e-ishq mein qurbani de

aaina sang-e-dar-e-dost hua bhi to kya

sar jo sajde mein jhuke lau teri peshani de

uf wo purkar jo sunte hi taghaful ka gila

ishwa-o-naz ko talim-e-pashimani de

dil-e-betab-e-tamasha ki tasalli malum

apne har jalwe ko ek paikar-e-insani de

us ki angDai ka aalam to kabhi dekh ai gul

aur hi husn teri chaak-garebani de

aao shiraaza-e-hasti ko pareshan kar den

yun ki us zulf ko paigham-e-pareshani de

teri sarkar ghani tera gada bhi hai ghani

kuchh na de aur jo de gham ki farawani de

is tawaqqo pe hun KHamosh ki wo shoKH-nigah

phir Tahoka pa-e-taqrib-e-ghazal-KHwani de