nigahban-e-chaman ab dhup aur pani se kya hoga

nigahbān-e-chaman ab dhuup aur paanī se kyā hogā

muqaddar meñ hai tārājī nigahbānī se kyā hogā

masāfat hijr kī ye soch kar tai kar rahe haiñ ham

agar mushkil nahīñ hogī to āsānī se kyā hogā

dil-e-nādāñ ne saare ma.arke sar kar liye āḳhir

ye nādānī thī ham samjhe the nādānī se kyā hogā

na kuchh ho kar bhī apnī zaat meñ ik anjuman haiñ ham

atiyya hai ye darveshī kā sultānī se kyā hogā

salīqa chāhiye kār-e-junūñ kā ai junūñ vaalo

tavāf-e-dasht se aur chāk-dāmānī se kyā hogā

bahut dushvār hai fikr-e-ġhazal meñ taaq ho jaanā

hunar-mandī zarūrī hai hama-dānī se kyā hogā

ḳhudā kī ḳhaas ne.amat hai sukūn-e-jān-o-dil 'tāriq'

pareshānī meñ daulat kī farāvānī se kyā hogā

nigahban-e-chaman ab dhup aur pani se kya hoga

muqaddar mein hai taraji nigahbani se kya hoga

masafat hijr ki ye soch kar tai kar rahe hain hum

agar mushkil nahin hogi to aasani se kya hoga

dil-e-nadan ne sare marke sar kar liye aaKHir

ye nadani thi hum samjhe the nadani se kya hoga

na kuchh ho kar bhi apni zat mein ek anjuman hain hum

atiyya hai ye darweshi ka sultani se kya hoga

saliqa chahiye kar-e-junun ka ai junun walo

tawaf-e-dasht se aur chaak-damani se kya hoga

bahut dushwar hai fikr-e-ghazal mein taq ho jaana

hunar-mandi zaruri hai hama-dani se kya hoga

KHuda ki KHas neamat hai sukun-e-jaan-o-dil 'tariq'

pareshani mein daulat ki farawani se kya hoga