nihaal-e-husn bahut kam samay ka sathi tha

nihāl-e-husn bahut kam samay kā sāthī thā

magar jo naqsh mire aa.ine kā sāthī thā

bahut ġhurūr se phirtā thā maiñ junūñ-āsār

vo is liye ki tire qāfile kā sāthī thā

mirī talab thī magar sā'at-e-yaqīn talak

vo kam-nigāh bhī do-ātishe kā sāthī thā

ki rang-e-raftagī har vaqt thā nigāhoñ meñ

magar jo shaam ke daurāniye kā sāthī thā

phir ek roz vo gard-e-shafaq meñ duub gayā

jo intizār kisī tāqche kā sāthī thā

magar vo niiñd vo jannat kā pesh-ḳhema niiñd

jahāñ pe har koī ik dūsre kā sāthī thā

usī ne TuuT ke āñkhoñ meñ raushnī bhar dī

jo ik sitāra mire ratjage kā sāthī thā

use to chāhiye vo saath de sahārā de

use ḳhabar hai vo achchhe-bure kā sāthī thā

mire liye mirī bāñheñ qafas banī huī thiiñ

mire liye to añdherā diye kā sāthī thā

ye razm-gāh abābīl khā ga.ī mere

tamām shahr yahāñ abrahe kā sāthī thā

nihaal-e-husn bahut kam samay ka sathi tha

magar jo naqsh mere aaine ka sathi tha

bahut ghurur se phirta tha main junun-asar

wo is liye ki tere qafile ka sathi tha

meri talab thi magar sa'at-e-yaqin talak

wo kam-nigah bhi do-atishe ka sathi tha

ki rang-e-raftagi har waqt tha nigahon mein

magar jo sham ke dauraniye ka sathi tha

phir ek roz wo gard-e-shafaq mein dub gaya

jo intizar kisi taqche ka sathi tha

magar wo nind wo jannat ka pesh-KHema nind

jahan pe har koi ek dusre ka sathi tha

usi ne TuT ke aankhon mein raushni bhar di

jo ek sitara mere ratjage ka sathi tha

use to chahiye wo sath de sahaara de

use KHabar hai wo achchhe-bure ka sathi tha

mere liye meri banhen qafas bani hui thin

mere liye to andhera diye ka sathi tha

ye razm-gah ababil kha gai mere

tamam shahr yahan abrahe ka sathi tha