نیند آنکھوں میں بھری رات گنوائی بھی نہیں

نیند آنکھوں میں بھری رات گنوائی بھی نہیں

دولت خواب مگر ہم نے کمائی بھی نہیں

کیسے آشوب خموشی میں گھری ہے بستی

نغمۂ دل نہیں آشفتہ نوائی بھی نہیں

میں ہی تنہا تھا ہر اک سنگ ملامت کا ہدف

اس جفا کار پہ انگشت نمائی بھی نہیں

کون سادات گھرانے کے ہیں ہم لوگ میاں

ذلت عشق اٹھانا تھی اٹھائی بھی نہیں

جانے کس دھیان میں گم صم وہ سر بزم رہا

وجد آور تھی غزل اس نے سنائی بھی نہیں

چھوٹ جانے کا لگا رہتا ہے دھڑکا ثاقبؔ

جب کہ رفتار سفر اس نے بڑھائی بھی نہیں