nind aankhon mein bhari raat ganwai bhi nahin

niiñd āñkhoñ meñ bharī raat gañvā.ī bhī nahīñ

daulat-e-ḳhvāb magar ham ne kamā.ī bhī nahīñ

kaise āshob-e-ḳhamoshī meñ ghirī hai bastī

naġhma-e-dil nahīñ āshufta-navā.ī bhī nahīñ

maiñ hī tanhā thā har ik sang-e-malāmat kā hadaf

us jafā-kār pe angusht-numā.ī bhī nahīñ

kaun sādāt gharāne ke haiñ ham log miyāñ

zillat-e-‘ishq uThānā thī uThā.ī bhī nahīñ

jaane kis dhyān meñ gum-sum vo sar-e-bazm rahā

vajd-āvar thī ġhazal us ne sunā.ī bhī nahīñ

chhūT jaane kā lagā rahtā hai dhaḌkā 'sāqib'

jab ki raftār-e-safar us ne baḌhā.ī bhī nahīñ

nind aankhon mein bhari raat ganwai bhi nahin

daulat-e-KHwab magar hum ne kamai bhi nahin

kaise aashob-e-KHamoshi mein ghiri hai basti

naghma-e-dil nahin aashufta-nawai bhi nahin

main hi tanha tha har ek sang-e-malamat ka hadaf

us jafa-kar pe angusht-numai bhi nahin

kaun sadat gharane ke hain hum log miyan

zillat-e-‘ishq uThana thi uThai bhi nahin

jaane kis dhyan mein gum-sum wo sar-e-bazm raha

wajd-awar thi ghazal us ne sunai bhi nahin

chhuT jaane ka laga rahta hai dhaDka 'saqib'

jab ki raftar-e-safar us ne baDhai bhi nahin