nind aankhon mein rahe phir bhi na soya jae

niiñd āñkhoñ meñ rahe phir bhī na soyā jaa.e

maiñ vo patthar huuñ ki ro.uuñ to na royā jaa.e

ajnabī hai tire ḳhush-rañg badan kī ḳhushbū

ik zarā lams-e-vafā tujh meñ samoyā jaa.e

shab ke sahrā ne ajab pyaas likhī hai mujh meñ

mujh ko ḳhurshed ke sho.aloñ meñ Duboyā jaa.e

maiñ ne tanhā.ī meñ jal kar bhī yahī chāhā hai

ḳhushbuoñ se tire āñchal ko bhigoyā jaa.e

zindagī ko hai zarūrat na.e pairāhan kī

apne hī ḳhuun meñ apne ko Duboyā jaa.e

nind aankhon mein rahe phir bhi na soya jae

main wo patthar hun ki roun to na roya jae

ajnabi hai tere KHush-rang badan ki KHushbu

ek zara lams-e-wafa tujh mein samoya jae

shab ke sahra ne ajab pyas likhi hai mujh mein

mujh ko KHurshed ke shoalon mein Duboya jae

main ne tanhai mein jal kar bhi yahi chaha hai

KHushbuon se tere aanchal ko bhigoya jae

zindagi ko hai zarurat nae pairahan ki

apne hi KHun mein apne ko Duboya jae