nind aankhon se uDi aur main shab bhar jaga

niiñd āñkhoñ se uḌī aur maiñ shab bhar jaagā

tū na aaya na kabhī merā muqaddar jaagā

be-sabab āñkhoñ meñ tūfāñ nahīñ machlā karte

Thes kuchh dil pe lagī hai ki samundar jaagā

dauḌ kar us ke bahāroñ ne qadam chuum liye

le ke añgḌā.ī jo vo husn kā paikar jaagā

merī har shab isī ummīd meñ kaT jaatī hai

vo abhī aaya abhī merā muqaddar jaagā

phir mire dil kā lahū risne lagā āñkhoñ se

phir sar-e-shām tirī yaad kā nashtar jaagā

zulf chehre se haTī chāñd ghaTā se niklā

chāñdnī phail ga.ī raat kā manzar jaagā

jis pe Thahrī hai nazar us ko diye haiñ jauhar

chhū liyā ham ne jise 'shād' vo patthar jaagā

nind aankhon se uDi aur main shab bhar jaga

tu na aaya na kabhi mera muqaddar jaga

be-sabab aankhon mein tufan nahin machla karte

Thes kuchh dil pe lagi hai ki samundar jaga

dauD kar us ke bahaaron ne qadam chum liye

le ke angDai jo wo husn ka paikar jaga

meri har shab isi ummid mein kaT jati hai

wo abhi aaya abhi mera muqaddar jaga

phir mere dil ka lahu risne laga aankhon se

phir sar-e-sham teri yaad ka nashtar jaga

zulf chehre se haTi chand ghaTa se nikla

chandni phail gai raat ka manzar jaga

jis pe Thahri hai nazar us ko diye hain jauhar

chhu liya hum ne jise 'shad' wo patthar jaga