نیند آنکھوں سے اڑی اور میں شب بھر جاگا

نیند آنکھوں سے اڑی اور میں شب بھر جاگا

تو نہ آیا نہ کبھی میرا مقدر جاگا

بے سبب آنکھوں میں طوفاں نہیں مچلا کرتے

ٹھیس کچھ دل پہ لگی ہے کہ سمندر جاگا

دوڑ کر اس کے بہاروں نے قدم چوم لئے

لے کے انگڑائی جو وہ حسن کا پیکر جاگا

میری ہر شب اسی امید میں کٹ جاتی ہے

وہ ابھی آیا ابھی میرا مقدر جاگا

پھر مرے دل کا لہو رسنے لگا آنکھوں سے

پھر سر شام تری یاد کا نشتر جاگا

زلف چہرے سے ہٹی چاند گھٹا سے نکلا

چاندنی پھیل گئی رات کا منظر جاگا

جس پہ ٹھہری ہے نظر اس کو دیے ہیں جوہر

چھو لیا ہم نے جسے شادؔ وہ پتھر جاگا