nind aati hi nahin dhaDke ki bas aawaz se

niiñd aatī hī nahīñ dhaḌke kī bas āvāz se

tañg aayā huuñ maiñ is pur-soz dil ke saaz se

dil pisā jaatā hai un kī chaal ke andāz se

haath meñ dāman liye aate haiñ vo kis naaz se

saikaḌoñ murde jalā.e ho masīhā naaz se

maut sharminda huī kyā kyā tire e.ajāz se

bāġhbāñ kunj-e-qafas meñ muddatoñ se huuñ asiir

ab khule par bhī to maiñ vāqif nahīñ parvāz se

qabr meñ rāhat se so.e the na thā mahshar kā ḳhauf

ba.az aa.e ai masīhā ham tire e.ajāz se

vaa.e ġhaflat bhī nahīñ hotī ki dam bhar chain ho

chauñk paḌtā huuñ shikast-e-hosh kī āvāz se

naaz ma.ashūqāna se ḳhālī nahīñ hai koī baat

mere lāshe ko uThā.e haiñ vo kis andāz se

qabr meñ so.e haiñ mahshar kā nahīñ khaTkā 'rasā'

chauñkne vaale haiñ kab ham suur kī āvāz se

nind aati hi nahin dhaDke ki bas aawaz se

tang aaya hun main is pur-soz dil ke saz se

dil pisa jata hai un ki chaal ke andaz se

hath mein daman liye aate hain wo kis naz se

saikaDon murde jalae ho masiha naz se

maut sharminda hui kya kya tere eajaz se

baghban kunj-e-qafas mein muddaton se hun asir

ab khule par bhi to main waqif nahin parwaz se

qabr mein rahat se soe the na tha mahshar ka KHauf

baz aae ai masiha hum tere eajaz se

wae ghaflat bhi nahin hoti ki dam bhar chain ho

chaunk paDta hun shikast-e-hosh ki aawaz se

naz mashuqana se KHali nahin hai koi baat

mere lashe ko uThae hain wo kis andaz se

qabr mein soe hain mahshar ka nahin khaTka 'rasa'

chaunkne wale hain kab hum sur ki aawaz se