nind ke badle tasalli hi sahi aati to hai

niiñd ke badle tasallī hī sahī aatī to hai

dil se bāteñ karte karte raat kaT jaatī to hai

kyā isī kā naam hai soz-e-mohabbat ham-nashīñ

ek bijlī sī mirī rag rag meñ lahrātī to hai

is se baḌh kar aur kyā tāsīr ġham kī chāhiye

dil kī aahoñ se jigar kī choT chhil jaatī to hai

kyā yahī hai ai mohabbat hastī-e-dil kā ma.aal

ik lahū kī buuñd mizhgāñ par nazar aatī to hai

kuchh ba-zāhir vāsta is se hameñ ho yā na ho

dekh kar us kī nigāheñ ruuh tharrātī to hai

soz-e-ġham se jab bahut jaltā hai dil apnā 'jigar'

ruuh kī manzil meñ kuchh kuchh raushnī aatī to hai

nind ke badle tasalli hi sahi aati to hai

dil se baaten karte karte raat kaT jati to hai

kya isi ka nam hai soz-e-mohabbat ham-nashin

ek bijli si meri rag rag mein lahraati to hai

is se baDh kar aur kya tasir gham ki chahiye

dil ki aahon se jigar ki choT chhil jati to hai

kya yahi hai ai mohabbat hasti-e-dil ka maal

ek lahu ki bund mizhgan par nazar aati to hai

kuchh ba-zahir wasta is se hamein ho ya na ho

dekh kar us ki nigahen ruh tharraati to hai

soz-e-gham se jab bahut jalta hai dil apna 'jigar'

ruh ki manzil mein kuchh kuchh raushni aati to hai