nind ki goliyan kha ke sota hai wo

niiñd kī goliyāñ khā ke sotā hai vo

rāt-bhar kitnā mad.hosh hotā hai vo

rone vāloñ pe hañsnā thā us kā chalan

aaj kyoñ hañsne vāloñ pe rotā hai vo

apne isyāñ ke dāġhoñ ko shām-o-sahar

ashk-hā-e-nadāmat se dhotā hai vo

vāhimoñ vasvasoñ meñ ulajh kar abas

jaan khotā hai dil ko Dubotā hai vo

merī āfāt meñ apnī har baat meñ

tanz-o-ta.ana ke nashtar chubhotā hai vo

jhuuT bhī us kā ma.alūm hotā hai sach

dāstāñ meñ haqīqat samotā hai vo

kyoñ na paa.e murād apnī mard-e-amal

kisht-e-ummīd meñ azm botā hai vo

mahfiloñ kā tamannā.ī hai aadmī

apne jism-e-javāñ ko sañjotā hai vo

'krishn-mohan' ke azkār kī baat kyā

sher kahtā hai motī pirotā hai vo

nind ki goliyan kha ke sota hai wo

raat-bhar kitna madhosh hota hai wo

rone walon pe hansna tha us ka chalan

aaj kyon hansne walon pe rota hai wo

apne isyan ke daghon ko sham-o-sahar

ashk-ha-e-nadamat se dhota hai wo

wahimon waswason mein ulajh kar abas

jaan khota hai dil ko Dubota hai wo

meri aafat mein apni har baat mein

tanz-o-tana ke nashtar chubhota hai wo

jhuT bhi us ka malum hota hai sach

dastan mein haqiqat samota hai wo

kyon na pae murad apni mard-e-amal

kisht-e-ummid mein azm bota hai wo

mahfilon ka tamannai hai aadmi

apne jism-e-jawan ko sanjota hai wo

'krishn-mohan' ke azkar ki baat kya

sher kahta hai moti pirota hai wo