nind se jagi hui aankhon ko andha kar diya

niiñd se jaagī huī āñkhoñ ko andhā kar diyā

dhund ne shaffāf ā.inoñ ko dhuñdlā kar diyā

joḌtā rahtā huuñ TuuTe rābtoñ kā fāsla

mujh ko lamhoñ ke sarāboñ ne akelā kar diyā

chīḳhtā phirtā hai saḌkoñ par sadāoñ kā hujūm

kis ḳhamoshī ne galī-kūchoñ ko bahrā kar diyā

har sadā Takrā ke behis ḳhāmushī se gir paḌī

har sadā ne ḳhāmushī ko aur gahrā kar diyā

ham ne phir shaffāf rastoñ par bichā.ī aañkh aañkh

ham ne phir ā.īna-e-dil reza reza kar diyā

ham ne pahnā.e haiñ ḳhvāhish ko ragoñ ke pairahan

us ne māñgī buuñd ham ne ḳhuun dariyā kar diyā

shahr kī betāb galiyoñ ne ugal Daale haiñ log

kis ne mere shahr meñ murdoñ ko zinda kar diyā

jam ga.e dīvār-o-dar par gūñjte lafzoñ ke naqsh

ek hañgāme ne saarā shahr gūñgā kar diyā

aañkh meñ dhuñdlā gayā nikhre hue chehroñ kā rang

jagmagāte ā.inoñ ko kis ne mailā kar diyā

ek ik chehre pe 'sarmad' paḌ ga.ī shak kī lakīr

jaane kis bad-rūh ne logoñ pe saaya kar diyā

nind se jagi hui aankhon ko andha kar diya

dhund ne shaffaf aainon ko dhundla kar diya

joDta rahta hun TuTe rabton ka fasla

mujh ko lamhon ke sarabon ne akela kar diya

chiKHta phirta hai saDkon par sadaon ka hujum

kis KHamoshi ne gali-kuchon ko bahra kar diya

har sada Takra ke behis KHamushi se gir paDi

har sada ne KHamushi ko aur gahra kar diya

hum ne phir shaffaf raston par bichai aankh aankh

hum ne phir aaina-e-dil reza reza kar diya

hum ne pahnae hain KHwahish ko ragon ke pairahan

us ne mangi bund hum ne KHun dariya kar diya

shahr ki betab galiyon ne ugal Dale hain log

kis ne mere shahr mein murdon ko zinda kar diya

jam gae diwar-o-dar par gunjte lafzon ke naqsh

ek hangame ne sara shahr gunga kar diya

aankh mein dhundla gaya nikhre hue chehron ka rang

jagmagate aainon ko kis ne maila kar diya

ek ek chehre pe 'sarmad' paD gai shak ki lakir

jaane kis bad-ruh ne logon pe saya kar diya