nind uDne ka sabab aur chain khone ka jawaz

niiñd uḌne kā sabab aur chain khone kā javāz

pūchhte haiñ log mujh se 'ishq hone kā javāz

laḌ rahā huuñ maiñ akelā kār-zār-e-hastī meñ

kar farāham tū bhī zālim apne hone kā javāz

DhūñDte haiñ log kaise harf-e-tund-o-tez se

dūsroñ kī ruuh meñ kāñTe chubhone kā javāz

ye zarūrī to nahīñ ham bhī farāham kar sakeñ

baiThe baiThe apne dāman ko bhigone kā javāz

sāhiloñ par āfiyat mā'dūm ho jaane ke baa'd

aur kyā hogā bhalā kashtī Dubone kā javāz

zabt ke bandhan ko jis ne toḌ Daalā hai 'munīr'

pūchhtā hai dūsroñ se mere rone kā javāz

nind uDne ka sabab aur chain khone ka jawaz

puchhte hain log mujh se 'ishq hone ka jawaz

laD raha hun main akela kar-zar-e-hasti mein

kar faraham tu bhi zalim apne hone ka jawaz

DhunDte hain log kaise harf-e-tund-o-tez se

dusron ki ruh mein kanTe chubhone ka jawaz

ye zaruri to nahin hum bhi faraham kar saken

baiThe baiThe apne daman ko bhigone ka jawaz

sahilon par aafiyat ma'dum ho jaane ke ba'd

aur kya hoga bhala kashti Dubone ka jawaz

zabt ke bandhan ko jis ne toD Dala hai 'munir'

puchhta hai dusron se mere rone ka jawaz