nikali jae kis tarkib se taqrir ki surat

nikālī jaa.e kis tarkīb se taqrīr kī sūrat

vo ā.īne kī sūrat aur maiñ tasvīr kī sūrat

giraftār-e-mohabbat kar liyā bātoñ hī bātoñ meñ

tasalsul se numāyāñ ho ga.ī zanjīr kī sūrat

ziyāda ā.īne se hai munavvar mus.haf-e-āriz

aur is par ḳhāl-e-mushkīñ āya-e-tat.hīr kī sūrat

tire tevar badalte hī zamāna ho gayā dushman

hilāl-e-īd bhī zāhir huā shamshīr kī sūrat

sitam ho jā.egā gar baal bhī bekā huā us kā

nikal kar aah siine se ga.ī hai tiir kī sūrat

kabhī mīThī nigāheñ haiñ kabhī tevar badalte haiñ

na martā huuñ na jiitā huuñ ye hai ta.azīr kī sūrat

maza kyā us but-e-be-pīr se dil ke lagāne kā

jo ḳhalvat meñ ho but mahfil meñ ho tasvīr kī sūrat

ḳhafā hote hī kuchh kā kuchh bhavoñ kā ho gayā naqsha

kabhī ḳhanjar kī sūrat aur kabhī shamshīr kī sūrat

jise mil jaa.e ḳhāk-e-pāk-e-dasht-e-karbalā 'parvīñ'

palaT kar bhī na dekhe vo kabhī iksīr kī sūrat

nikali jae kis tarkib se taqrir ki surat

wo aaine ki surat aur main taswir ki surat

giraftar-e-mohabbat kar liya baaton hi baaton mein

tasalsul se numayan ho gai zanjir ki surat

ziyaada aaine se hai munawwar mushaf-e-ariz

aur is par KHal-e-mushkin aaya-e-tathir ki surat

tere tewar badalte hi zamana ho gaya dushman

hilal-e-id bhi zahir hua shamshir ki surat

sitam ho jaega gar baal bhi beka hua us ka

nikal kar aah sine se gai hai tir ki surat

kabhi miThi nigahen hain kabhi tewar badalte hain

na marta hun na jita hun ye hai tazir ki surat

maza kya us but-e-be-pir se dil ke lagane ka

jo KHalwat mein ho but mahfil mein ho taswir ki surat

KHafa hote hi kuchh ka kuchh bhawon ka ho gaya naqsha

kabhi KHanjar ki surat aur kabhi shamshir ki surat

jise mil jae KHak-e-pak-e-dasht-e-karbala 'parwin'

palaT kar bhi na dekhe wo kabhi iksir ki surat