nikal aaya wo ghabra kar dil us ka is qadar dhaDka

nikal aayā vo ghabrā kar dil us kā is qadar dhaḌkā

sadā bijlī kī dī naale ne jab muñh se mire kaḌkā

Thahar kuchh din meñ dast-andāziyoñ kā vaqt aa.egā

nihāl-e-nau-damīda huuñ bharosa kyā mirī jaḌ kā

hamesha ḳhāk-o-ḳhūñ meñ mujh ko betābī biThāyā kī

ba-shakl-e-murġh-e-bismil kaun se pahlū nahīñ phaḌkā

ḳhayāl-e-āriz-e-raushan meñ sub.h-o-shām yaksāñ hai

yahāñ āThoñ-pahar pesh-e-nazar hai nuur kā taḌkā

ye sach hai vaqt par be-raunaqī bhī kaam aatī hai

nihāl-e-ḳhushk ko khaTkā nahīñ hotā hai patjhaḌ kā

na kyuuñ pinhāñ rakhūñ dāman meñ us ko kam-nigāhoñ se

samajhtā huuñ maiñ apnā ashk-e-gulgūñ la.al gūdaḌ kā

guzartā hai salāmat vāqif-e-anjām matlab se

nahīñ rasta khaTaktā aañkh meñ dahqāñ kī bīhaḌ kā

liye haiñ gul ke bose aaj kis chorī se bulbul ne

paḌā soyā kiyā gulchīñ koī pattā nahīñ khaḌkā

chhupāyā parda-e-fānūs ban kar jism-e-uryāñ ne

darūn-e-ustuḳhvāñ se jis ghaḌī sho.ala koī bhaḌkā

ba-juz iimā kalām-e-ishq matlab se muarra hai

kisī par raaz khul saktā nahīñ majzūb kī baḌ kā

fasāhat ke ḳhilāf aa.e nazar sab qāfiye ham ko

'nasīm' aisī zamīñ par kījiye itlāq bīhaḌ kā

nikal aaya wo ghabra kar dil us ka is qadar dhaDka

sada bijli ki di nale ne jab munh se mere kaDka

Thahar kuchh din mein dast-andaziyon ka waqt aaega

nihaal-e-nau-damida hun bharosa kya meri jaD ka

hamesha KHak-o-KHun mein mujh ko betabi biThaya ki

ba-shakl-e-murgh-e-bismil kaun se pahlu nahin phaDka

KHayal-e-ariz-e-raushan mein subh-o-sham yaksan hai

yahan aaThon-pahar pesh-e-nazar hai nur ka taDka

ye sach hai waqt par be-raunaqi bhi kaam aati hai

nihaal-e-KHushk ko khaTka nahin hota hai patjhaD ka

na kyun pinhan rakhun daman mein us ko kam-nigahon se

samajhta hun main apna ashk-e-gulgun lal gudaD ka

guzarta hai salamat waqif-e-anjam matlab se

nahin rasta khaTakta aankh mein dahqan ki bihaD ka

liye hain gul ke bose aaj kis chori se bulbul ne

paDa soya kiya gulchin koi patta nahin khaDka

chhupaya parda-e-fanus ban kar jism-e-uryan ne

darun-e-ustuKHwan se jis ghaDi shoala koi bhaDka

ba-juz ima kalam-e-ishq matlab se muarra hai

kisi par raaz khul sakta nahin majzub ki baD ka

fasahat ke KHilaf aae nazar sab qafiye hum ko

'nasim' aisi zamin par kijiye itlaq bihaD ka