nikal gae the jo sahra mein apne itni dur

nikal ga.e the jo sahrā meñ apne itnī duur

vo log kaun se sūraj meñ jal rahe hoñge

adam kī niiñd meñ so.e hue kahāñ haiñ vo ab

jo kal vajūd kī āñkhoñ ko mal rahe hoñge

mile na ham ko javāb apne jin savāloñ ke

kisī zamāne meñ un ke bhī hal rahe hoñge

bas is ḳhayāl se dekhā tamām logoñ ko

jo aaj aise haiñ kaise vo kal rahe hoñge

phir ibtidā kī taraf hogā intihā kā ruḳh

ham ek din yahāñ shakleñ badal rahe hoñge

'malāl' aise ka.ī log hoñge raste meñ

jo tum se tez yā āhista chal rahe hoñge

nikal gae the jo sahra mein apne itni dur

wo log kaun se suraj mein jal rahe honge

adam ki nind mein soe hue kahan hain wo ab

jo kal wajud ki aankhon ko mal rahe honge

mile na hum ko jawab apne jin sawalon ke

kisi zamane mein un ke bhi hal rahe honge

bas is KHayal se dekha tamam logon ko

jo aaj aise hain kaise wo kal rahe honge

phir ibtida ki taraf hoga intiha ka ruKH

hum ek din yahan shaklen badal rahe honge

'malal' aise kai log honge raste mein

jo tum se tez ya aahista chal rahe honge