nikal kar mere andar se koi bhi dar nahin aaya

nikal kar mere andar se koī bhī dar nahīñ aaya

hazāroñ kos chalne par bhī merā ghar nahīñ aaya

mirī āñkheñ rahīñ jab tak tirī āñkhoñ se vābasta

ubhar kar merī nazroñ meñ koī manzar nahīñ aaya

tire sachche nishāne par ye goyā zarb-e-kārī hai

mire sar tak tirā pheñkā huā patthar nahīñ aaya

mire ham-zād par is ghar ne jaane kyā kiyā jaadū

vo mere saath andar to gayā bāhar nahīñ aaya

dayār-e-shauq meñ 'jauhar' siyah saa.e miTāne ko

ujāle jis kī the poshāk vo paikar nahīñ aaya

nikal kar mere andar se koi bhi dar nahin aaya

hazaron kos chalne par bhi mera ghar nahin aaya

meri aankhen rahin jab tak teri aankhon se wabasta

ubhar kar meri nazron mein koi manzar nahin aaya

tere sachche nishane par ye goya zarb-e-kari hai

mere sar tak tera phenka hua patthar nahin aaya

mere ham-zad par is ghar ne jaane kya kiya jadu

wo mere sath andar to gaya bahar nahin aaya

dayar-e-shauq mein 'jauhar' siyah sae miTane ko

ujale jis ki the poshak wo paikar nahin aaya