نکل کر میرے اندر سے کوئی بھی در نہیں آیا

نکل کر میرے اندر سے کوئی بھی در نہیں آیا

ہزاروں کوس چلنے پر بھی میرا گھر نہیں آیا

مری آنکھیں رہیں جب تک تری آنکھوں سے وابستہ

ابھر کر میری نظروں میں کوئی منظر نہیں آیا

ترے سچے نشانے پر یہ گویا ضرب کاری ہے

مرے سر تک ترا پھینکا ہوا پتھر نہیں آیا

مرے ہم زاد پر اس گھر نے جانے کیا کیا جادو

وہ میرے ساتھ اندر تو گیا باہر نہیں آیا

دیار شوق میں جوہرؔ سیہ سائے مٹانے کو

اجالے جس کی تھے پوشاک وہ پیکر نہیں آیا