nikal kar tere kuche se faraaz-e-dar tak pahunche

nikal kar tere kūche se farāz-e-dār tak pahuñche

tire 'āshiq vafā ke āḳhirī me'yār tak pahuñche

na jaane kitne tūfān-e-havādis se guzar kar ham

tumhāre dil kī dhaḌkan tak tumhāre pyaar tak pahuñche

laboñ tak aa ke so jaate the dil ke sarmadī naġhme

baḌī mushkil se ham bhī jur.at-e-iz.hār tak pahuñche

jo dil tak hī rahā raqs-e-sharār-e-ġham to kyā hāsil

maza tab hai agar mere lab-e-iz.hār tak pahuñche

guloñ kī justujū karne ko to maiñ ne bhī kī lekin

mire dast-e-talab josh-e-junūñ meñ ḳhaar tak pahuñche

zarā sī jur.at-e-be-bāk se māhaul badlegā

sukūt-e-shab tirī pāzeb kī jhankār tak pahuñche

javāb-e-gardish-e-sāġhar kahāñ se lā.egī 'shāhid'

samajh kar gardish-e-daurāñ kisī mai-ḳhvār tak pahuñche

nikal kar tere kuche se faraaz-e-dar tak pahunche

tere 'ashiq wafa ke aaKHiri me'yar tak pahunche

na jaane kitne tufan-e-hawadis se guzar kar hum

tumhaare dil ki dhaDkan tak tumhaare pyar tak pahunche

labon tak aa ke so jate the dil ke sarmadi naghme

baDi mushkil se hum bhi jurat-e-izhaar tak pahunche

jo dil tak hi raha raqs-e-sharar-e-gham to kya hasil

maza tab hai agar mere lab-e-izhaar tak pahunche

gulon ki justuju karne ko to main ne bhi ki lekin

mere dast-e-talab josh-e-junun mein KHar tak pahunche

zara si jurat-e-be-bak se mahaul badlega

sukut-e-shab teri pazeb ki jhankar tak pahunche

jawab-e-gardish-e-saghar kahan se laegi 'shahid'

samajh kar gardish-e-dauran kisi mai-KHwar tak pahunche