nikal kar zabt ki had se fughan tak baat ja pahunchi

nikal kar zabt kī had se fuġhāñ tak baat jā pahuñchī

ḳhabar bhī hai dil-e-nādāñ kahāñ tak baat jā pahuñchī

maiñ iz.hār-e-mohabbat kar ke un se ḳhush nahīñ lekin

chalo achchhā huā gosh-e-girāñ tak baat jā pahuñchī

na ho sāmān-e-sairābī magar ye faḳhr kyā kam hai

hamārī pyaas kī pīr-e-muġhāñ tak baat jā pahuñchī

dil-e-bad-zan kī ye mujh par karam-farmā.iyāñ tauba

jahāñ tak maiñ nahīñ pahuñchā vahāñ tak baat jā pahuñchī

nikal aa.e sitāre merī uljhan ke tamāshe ko

zamīñ vāloñ kī kyūñkar āsmāñ tak baat jā pahuñchī

zamāne bhar meñ charchā hai hamāre ḳhūn-e-nāhaq kā

vahāñ tak hashr barpā hai jahāñ tak baat jā pahuñchī

unheñ ai 'soz' rusvā.ī kā apnī kab ḳhayāl aaya

nikal ke gūñge dil se jab zabāñ tak baat jā pahuñchī

nikal kar zabt ki had se fughan tak baat ja pahunchi

KHabar bhi hai dil-e-nadan kahan tak baat ja pahunchi

main izhaar-e-mohabbat kar ke un se KHush nahin lekin

chalo achchha hua gosh-e-giran tak baat ja pahunchi

na ho saman-e-sairabi magar ye faKHr kya kam hai

hamari pyas ki pir-e-mughan tak baat ja pahunchi

dil-e-bad-zan ki ye mujh par karam-farmaiyan tauba

jahan tak main nahin pahuncha wahan tak baat ja pahunchi

nikal aae sitare meri uljhan ke tamashe ko

zamin walon ki kyunkar aasman tak baat ja pahunchi

zamane bhar mein charcha hai hamare KHun-e-nahaq ka

wahan tak hashr barpa hai jahan tak baat ja pahunchi

unhen ai 'soz' ruswai ka apni kab KHayal aaya

nikal ke gunge dil se jab zaban tak baat ja pahunchi