nikalne wale na the zindagi ke khel se hum

nikalne vaale na the zindagī ke khel se ham

ki chain khīñch ke utre the ḳhud hī rail se ham

rahā nahīñ bhī vo kartā to mas.ala nahīñ thā

farār yuuñ bhī to ho jaate us kī jail se ham

suḳhan meñ sho.abada-bāzī ke ham nahīñ qaa.il

bañdhe hue haiñ rivāyāt kī nakel se ham

jise bhī dekho lubhāyā huā hai duniyā kā

so bach ga.e haiñ miyāñ kaise is rakhel se ham

agar ye tai hai ki farhād-o-qais murda-bād

to baaz aa.e mohabbat kī dāġh-bel se ham

akele rahte to shāyad na dekhtā koī

sitāra ho ga.e ik raushnī ke mel se ham

ham aise peḌ bas itnī sī baat par ḳhush the

ki bel ham se lipaTtī hai aur bel se ham

ḳhudā ne qa.ar-e-falākat meñ ham ko jhoñk diyā

bigaḌ ga.e the suhūlat kī rel-pel se ham

nikalne wale na the zindagi ke khel se hum

ki chain khinch ke utre the KHud hi rail se hum

raha nahin bhi wo karta to masala nahin tha

farar yun bhi to ho jate us ki jail se hum

suKHan mein shoabada-bazi ke hum nahin qail

bandhe hue hain riwayat ki nakel se hum

jise bhi dekho lubhaya hua hai duniya ka

so bach gae hain miyan kaise is rakhel se hum

agar ye tai hai ki farhad-o-qais murda-baad

to baz aae mohabbat ki dagh-bel se hum

akele rahte to shayad na dekhta koi

sitara ho gae ek raushni ke mel se hum

hum aise peD bas itni si baat par KHush the

ki bel hum se lipaTti hai aur bel se hum

KHuda ne qar-e-falakat mein hum ko jhonk diya

bigaD gae the suhulat ki rel-pel se hum