نکہت عشق سے وابستہ ہیں گیسو تیرے

نکہت عشق سے وابستہ ہیں گیسو تیرے

ہم کہاں جائیں بتا چھوڑ کے پہلو تیرے

تیری سانسوں کی چھون اف یہ لبوں کی لرزش

کون سمجھا ہے یہاں جسم کے جادو تیرے

یہ اٹھیں اور چلیں مڑ کے کبھی رک جائیں

مجھ میں کیا ڈھونڈھتے ہیں آنکھوں کے آہو تیرے

کوئی اب جائے مفر میرے لئے ہے ہی نہیں

جان لے لیں گے بلاتے ہوئے بازو تیرے

اب کسی اور کو دیکھوں بھی تو کیسے دیکھوں

جلوے بے قابو پھرا کرتے ہیں ہر سو تیرے

صنف نازک ہے غزل پیش سلیقے سے آ

شعر سختی سے نہ آئیں گے یہ قابو تیرے

کب کہاں خوش ہے کہاں غم سے پریشاں ہے تو

حال دل مجھ کو بتا دیتے ہیں آنسو تیرے