nikhat-e-ishq se wabasta hain gesu tere

nik.hat-e-ishq se vābasta haiñ gesū tere

ham kahāñ jaa.eñ batā chhoḌ ke pahlū tere

terī sāñsoñ kī chhuan uf ye laboñ kī larzish

kaun samjhā hai yahāñ jism ke jaadū tere

ye uTheñ aur chaleñ muḌ ke kabhī ruk jaa.eñ

mujh meñ kyā DhūñDhte haiñ āñkhoñ ke aahū tere

koī ab jā-e-mafar mere liye hai hī nahīñ

jaan le leñge bulāte hue baazū tere

ab kisī aur ko dekhūñ bhī to kaise dekhūñ

jalve be-qābū phirā karte haiñ har-sū tere

sinf-e-nāzuk hai ġhazal pesh salīqe se aa

sher saḳhtī se na ā.eñge ye qaabū tere

kab kahāñ ḳhush hai kahāñ ġham se pareshāñ hai tū

hāl-e-dil mujh ko batā dete haiñ aañsū tere

nikhat-e-ishq se wabasta hain gesu tere

hum kahan jaen bata chhoD ke pahlu tere

teri sanson ki chhuan uf ye labon ki larzish

kaun samjha hai yahan jism ke jadu tere

ye uThen aur chalen muD ke kabhi ruk jaen

mujh mein kya DhunDhte hain aankhon ke aahu tere

koi ab ja-e-mafar mere liye hai hi nahin

jaan le lenge bulate hue bazu tere

ab kisi aur ko dekhun bhi to kaise dekhun

jalwe be-qabu phira karte hain har-su tere

sinf-e-nazuk hai ghazal pesh saliqe se aa

sher saKHti se na aaenge ye qabu tere

kab kahan KHush hai kahan gham se pareshan hai tu

haal-e-dil mujh ko bata dete hain aansu tere