nikhre hue aariz hain bikhre hue gesu bhi

nikhre hue aariz haiñ bikhre hue gesū bhī

ai ahl-e-nazar dekho jalva bhī hai jaadū bhī

mausam kī tarah un ke tevar bhī badalte haiñ

phir jaatī haiñ nazreñ bhī tan jaate haiñ abrū bhī

iz.hār-e-tamannā par hañs hañs ke nahīñ kahnā

inkār meñ shāmil hai iqrār kā pahlū bhī

ai 'ishq batā tū hī ye kaun sā 'ālam hai

hoñToñ pe tabassum hai āñkhoñ meñ haiñ aañsū bhī

gulshan meñ bhī dīvāno sahrā ke maze luuTo

gardish meñ hai bazm-e-gul āvāra hai ḳhushbū bhī

sach hai ki mirā dāman ālūda hai ai vā'iz

ye jhuuT nahīñ lekin be-dāġh nahīñ tū bhī

arbāb-e-siyāsat se kahnā hai 'shahīd' itnā

arbāb-e-mohabbat kā shahkār hai urdu bhī

nikhre hue aariz hain bikhre hue gesu bhi

ai ahl-e-nazar dekho jalwa bhi hai jadu bhi

mausam ki tarah un ke tewar bhi badalte hain

phir jati hain nazren bhi tan jate hain abru bhi

izhaar-e-tamanna par hans hans ke nahin kahna

inkar mein shamil hai iqrar ka pahlu bhi

ai 'ishq bata tu hi ye kaun sa 'alam hai

honTon pe tabassum hai aankhon mein hain aansu bhi

gulshan mein bhi diwano sahra ke maze luTo

gardish mein hai bazm-e-gul aawara hai KHushbu bhi

sach hai ki mera daman aaluda hai ai wa'iz

ye jhuT nahin lekin be-dagh nahin tu bhi

arbab-e-siyasat se kahna hai 'shahid' itna

arbab-e-mohabbat ka shahkar hai urdu bhi