nikla hun shahr-e-KHwab se aise ajib haal mein

niklā huuñ shahr-e-ḳhvāb se aise ajiib haal meñ

ġharb mire junūb meñ sharq mire shumāl meñ

koī kahīñ se aa.e aur mujh se kahe ki zindagī

terī talāsh meñ hai dost baiThā hai kis ḳhayāl meñ

DhūñDte phir rahe haiñ sab merī jagah mirā sabab

koī hazār miil meñ koī hazār saal meñ

lafzoñ ke iḳhtisār se kam to huī sazā mirī

pahle kahāniyoñ meñ thā ab huuñ maiñ ik misāl meñ

mez pe roz sub.h-dam taaza gulāb dekh kar

lagtā nahīñ ki ho koī mujh sā mire ayaal meñ

phuul kahāñ se aa.e the aur kahāñ chale ga.e

vaqt na thā ki dekhtā paudoñ kī dekh-bhāl maiñ

kamroñ meñ bistaraoñ ke biich koī jagah nahīñ bachī

ḳhvāb hī ḳhvāb haiñ yahāñ ā.ankhoñ ke haspatāl meñ

gurg-o-samand o mūsh-o-sag chhāñT ke ek ek rag

phirte haiñ sab alag alag rahte haiñ ek khaal meñ

nikla hun shahr-e-KHwab se aise ajib haal mein

gharb mere junub mein sharq mere shumal mein

koi kahin se aae aur mujh se kahe ki zindagi

teri talash mein hai dost baiTha hai kis KHayal mein

DhunDte phir rahe hain sab meri jagah mera sabab

koi hazar mil mein koi hazar sal mein

lafzon ke iKHtisar se kam to hui saza meri

pahle kahaniyon mein tha ab hun main ek misal mein

mez pe roz subh-dam taza gulab dekh kar

lagta nahin ki ho koi mujh sa mere ayal mein

phul kahan se aae the aur kahan chale gae

waqt na tha ki dekhta paudon ki dekh-bhaal main

kamron mein bistaraon ke bich koi jagah nahin bachi

KHwab hi KHwab hain yahan aaankhon ke haspatal mein

gurg-o-samand o mush-o-sag chhanT ke ek ek rag

phirte hain sab alag alag rahte hain ek khaal mein