nikle chale aate hain tah-e-KHak se khane

nikle chale aate haiñ tah-e-ḳhāk se khāne

ye ḳhvān-e-karam kis ne bichhāyā hai ḳhudā ne

jo dil meñ hai muñh phoḌ ke barvar nahīñ kahte

maarā mujhe yāroñ kī durust aur bajā ne

ġhaflat meñ haiñ sar-mast badalte nahīñ karvaT

go sar pe uThā lī hai zamīñ shor-e-darā ne

isrāf ne arbāb-e-tamavvul ko Duboyā

aalim ko tafāḳhur ne to zāhid ko riyā ne

mard us ko samajhte na kiyā ho jise badmast

ayyām-e-javānī kī mai-e-hosh-rubā ne

bā-īñ-hama darmāndagī insāñ ke ye da.ave

kyā zāt-e-sharīf in ko banāyā hai ḳhudā ne

jalvat kā bharosa hai na ḳhalvat kī tavaqqo

sab vahm thā yāroñ ne jo taake the Thikāne

nikle chale aate hain tah-e-KHak se khane

ye KHwan-e-karam kis ne bichhaya hai KHuda ne

jo dil mein hai munh phoD ke barwar nahin kahte

mara mujhe yaron ki durust aur baja ne

ghaflat mein hain sar-mast badalte nahin karwaT

go sar pe uTha li hai zamin shor-e-dara ne

israf ne arbab-e-tamawwul ko Duboya

aalim ko tafaKHur ne to zahid ko riya ne

mard us ko samajhte na kiya ho jise badmast

ayyam-e-jawani ki mai-e-hosh-ruba ne

ba-in-hama darmandagi insan ke ye dawe

kya zat-e-sharif in ko banaya hai KHuda ne

jalwat ka bharosa hai na KHalwat ki tawaqqo

sab wahm tha yaron ne jo take the Thikane