نکلے تھے تو سر اونچا تھا ملبوس انا تھی

نکلے تھے تو سر اونچا تھا ملبوس انا تھی

اور لوٹے تو سر خاک بکف چاک قبا تھی

اب تک یہ خلش باقی ہے جو عمر ہے گزری

وہ خواب تھی یا خواب کی تعبیر تھی کیا تھی

اک لحظہ کو حشر اٹھا سر کوئے دل زار

پھر شہر خموشی میں فغاں تھی نہ نوا تھی

اے بے حسیٔ دل وہ بھی کروائے مقفل

ان ہونٹوں کی ہر بات تو تمثیل دعا تھی

اک میں تھا اور اک دوش پہ بھٹکاتی ہوئی زیست

اک برگ خزاں بار تھا اک موج صبا تھی

یہ کون تمرد پہ کمر بستہ ہوا آج

کل تک تو ہر اک بات پہ تسلیم و رضا تھی

یہ دن بھی ہے تو روند رہی ہے مجھے دنیا

وہ دن بھی تھے جب تو مری خاک کف پا تھی

اس صبح بہاراں کا فسوں ٹوٹا تو دیکھا

اک شہر خموشاں تھا اور اک شام قضا تھی

میں خوش تھا کہ دامان گلستاں میں چھپا ہوں

سرگرداں مری کھوج میں صحرا کی ہوا تھی