nikle teri duniya ke sitam aur tarah ke

nikle tirī duniyā ke sitam aur tarah ke

darkār mire dil ko the ġham aur tarah ke

tum aur tarah ke sahī ham aur tarah ke

ho jaa.eñ bas ab qaul-o-qasam aur tarah ke

but-ḳhāne kā manzar ba-ḳhudā aaj hī dekhā

the mere tasavvur meñ sanam aur tarah ke

kartī haiñ mire dil se vo ḳhāmosh nigāheñ

kuchh ramz ishāroñ se bhī kam aur tarah ke

ġham hote rahe dil meñ kam-o-besh va-lekin

besh aur tarah ke hue kam aur tarah ke

māyūs talab jaan ke is dasht-e-havas meñ

yāroñ ne diye haiñ mujhe dam aur tarah ke

rahtī hai kisī aur taraf aas nazar kī

haiñ vaqt ke hāthoñ meñ alam aur tarah ke

rahbar kā to andāz-e-qadam aur hī kuchh thā

haiñ qāfile vāloñ ke qadam aur tarah ke

kuchh aur haiñ us husn-e-basantī kī adā.eñ

haiñ naaz nigārān-e-ajam aur tarah ke

kahte ho ki phīkī sī rūnakhī sī haiñ ġhazleñ

lo sher sunā.eñ tumheñ ham aur tarah ke

ye kis ne kiyā yaad kahāñ jaate ho 'haqqī'

kuchh aaj to paḌte haiñ qadam aur tarah ke

nikle teri duniya ke sitam aur tarah ke

darkar mere dil ko the gham aur tarah ke

tum aur tarah ke sahi hum aur tarah ke

ho jaen bas ab qaul-o-qasam aur tarah ke

but-KHane ka manzar ba-KHuda aaj hi dekha

the mere tasawwur mein sanam aur tarah ke

karti hain mere dil se wo KHamosh nigahen

kuchh ramz ishaaron se bhi kam aur tarah ke

gham hote rahe dil mein kam-o-besh wa-lekin

besh aur tarah ke hue kam aur tarah ke

mayus talab jaan ke is dasht-e-hawas mein

yaron ne diye hain mujhe dam aur tarah ke

rahti hai kisi aur taraf aas nazar ki

hain waqt ke hathon mein alam aur tarah ke

rahbar ka to andaz-e-qadam aur hi kuchh tha

hain qafile walon ke qadam aur tarah ke

kuchh aur hain us husn-e-basanti ki adaen

hain naz nigaran-e-ajam aur tarah ke

kahte ho ki phiki si runakhi si hain ghazlen

lo sher sunaen tumhein hum aur tarah ke

ye kis ne kiya yaad kahan jate ho 'haqqi'

kuchh aaj to paDte hain qadam aur tarah ke