nipTenge dil se marka-e-rah-guzar ke baad

nipTeñge dil se ma.arka-e-rah-guzar ke ba.ad

leñge safar kā jā.eza ḳhatm-e-safar ke ba.ad

uThne ko in kī bazm meñ sab kī nazar uThī

itnā magar kahūñgā ki merī nazar ke ba.ad

sab zor ho rahā hai mirī sar-kashī pe sarf

kyā hogā hāl-e-dār-o-rasan mere sar ke ba.ad

kū-e-sitam se guzreñ to shorīdgān-e-ishq

hañsne lageñge zaḳhm-e-jigar zaḳhm-e-sar ke ba.ad

barq-e-sitam ko nazr karūñ bhī to kyā karūñ

ab kyā rahā hai aag lagāne ko ghar ke ba.ad

be-ḳhvāb kar rahe haiñ shab-e-ġham ke marhale

āñkheñ jhapak na jaa.eñ tulū-e-sahar ke ba.ad

hogā tavīl aur bhī afsāna-e-vafā

ahl-e-jafā ke tantana-e-muḳhtasar ke ba.ad

nipTenge dil se marka-e-rah-guzar ke baad

lenge safar ka jaeza KHatm-e-safar ke baad

uThne ko in ki bazm mein sab ki nazar uThi

itna magar kahunga ki meri nazar ke baad

sab zor ho raha hai meri sar-kashi pe sarf

kya hoga haal-e-dar-o-rasan mere sar ke baad

ku-e-sitam se guzren to shoridgan-e-ishq

hansne lagenge zaKHm-e-jigar zaKHm-e-sar ke baad

barq-e-sitam ko nazr karun bhi to kya karun

ab kya raha hai aag lagane ko ghar ke baad

be-KHwab kar rahe hain shab-e-gham ke marhale

aankhen jhapak na jaen tulu-e-sahar ke baad

hoga tawil aur bhi afsana-e-wafa

ahl-e-jafa ke tantana-e-muKHtasar ke baad