نشاؔ گھبرا کے کاشانوں سے ویرانوں میں آ پہنچے

نشاؔ گھبرا کے کاشانوں سے ویرانوں میں آ پہنچے

بہار آئی تو اہل دل بیابانوں میں آ پہنچے

ہماری کیا خطا ہے یہ خطا دیر و حرم کی ہے

خدا کا گھر نہ راس آیا تو مے خانوں میں آ پہنچے

ہماری گمرہی آخر ہمیں رستے پہ لے آئی

خرد کے دشت و در سے چل کے انسانوں میں آ پہنچے

گلوں کی باریابی کا سبب رنگ و لطافت ہے

یہ کانٹے کس طرح آخر گلستانوں میں آ پہنچے

قریں جب آ گئی منزل تو جانے کیا ہمیں سوجھی

پلٹ کر از سر نو پھر انہیں راہوں میں آ پہنچے

ابھی ہے دور فیض صحبت اخلاص کی دنیا

جو مے خواروں تک آ جائے تو انسانوں میں آ پہنچے

نہ آتا تھا نہ آئے وہ کچھ ایسی بات تھی لیکن

یہ کیا کم ہے دبے پاؤں مرے شعروں میں آ پہنچے