nisha ghabra ke kashanon se viranon mein aa pahunche

'nishā' ghabrā ke kāshānoñ se vīrānoñ meñ aa pahuñche

bahār aa.ī to ahl-e-dil bayābānoñ meñ aa pahuñche

hamārī kyā ḳhatā hai ye ḳhatā dair-o-haram kī hai

ḳhudā kā ghar na raas aaya to mai-ḳhānoñ meñ aa pahuñche

hamārī gumrahī āḳhir hameñ raste pe le aa.ī

ḳhirad ke dasht-o-dar se chal ke insānoñ meñ aa pahuñche

guloñ kī bāryābī kā sabab rang-o-latāfat hai

ye kāñTe kis tarah āḳhir gulistānoñ meñ aa pahuñche

qarīñ jab aa ga.ī manzil to jaane kyā hameñ sūjhī

palaT kar az-sar-e-nau phir unhīñ rāhoñ meñ aa pahuñche

abhī hai duur faiz-e-sohbat-e-iḳhlās kī duniyā

jo mai-ḳhvāroñ tak aa jaa.e to insānoñ meñ aa pahuñche

na aatā thā na aa.e vo kuchh aisī baat thī lekin

ye kyā kam hai dabe paañv mire sheroñ meñ aa pahuñche

'nisha' ghabra ke kashanon se viranon mein aa pahunche

bahaar aai to ahl-e-dil bayabanon mein aa pahunche

hamari kya KHata hai ye KHata dair-o-haram ki hai

KHuda ka ghar na ras aaya to mai-KHanon mein aa pahunche

hamari gumrahi aaKHir hamein raste pe le aai

KHirad ke dasht-o-dar se chal ke insanon mein aa pahunche

gulon ki baryabi ka sabab rang-o-latafat hai

ye kanTe kis tarah aaKHir gulistanon mein aa pahunche

qarin jab aa gai manzil to jaane kya hamein sujhi

palaT kar az-sar-e-nau phir unhin rahon mein aa pahunche

abhi hai dur faiz-e-sohbat-e-iKHlas ki duniya

jo mai-KHwaron tak aa jae to insanon mein aa pahunche

na aata tha na aae wo kuchh aisi baat thi lekin

ye kya kam hai dabe panw mere sheron mein aa pahunche