nishat-e-manzil-e-qalb-o-nazar ko yaad karo

nishāt-e-manzil-e-qalb-o-nazar ko yaad karo

safar meñ apne kisī ham-safar ko yaad karo

baḌe ḳhulūs se tārīk rāstoñ pe chalo

baḌe tapāk se husn-e-sahar ko yaad karo

jale charāġh to chupke se naam lo merā

mile ḳhushī to mirī chashm-e-tar ko yaad karo

jo dil meñ rah ke bhī anjān sī rahī barsoñ

kisī kī us nigah-e-fitna-gar ko yaad karo

dil-e-hazīñ kā taqāza hai jāda-e-ġham meñ

nazar ke saath fareb-e-nazar ko yaad karo

qadam qadam pe jahāñ zindagī nikhartī thī

kisī ke pyaar kī us rahguzar ko yaad karo

hai jis ke faiz se ab tak bhī raushnī ghar meñ

'ra.īs' ab bhī usī chashm-e-tar ko yaad karo

nishat-e-manzil-e-qalb-o-nazar ko yaad karo

safar mein apne kisi ham-safar ko yaad karo

baDe KHulus se tarik raston pe chalo

baDe tapak se husn-e-sahar ko yaad karo

jale charagh to chupke se nam lo mera

mile KHushi to meri chashm-e-tar ko yaad karo

jo dil mein rah ke bhi anjaan si rahi barson

kisi ki us nigah-e-fitna-gar ko yaad karo

dil-e-hazin ka taqaza hai jada-e-gham mein

nazar ke sath fareb-e-nazar ko yaad karo

qadam qadam pe jahan zindagi nikharti thi

kisi ke pyar ki us rahguzar ko yaad karo

hai jis ke faiz se ab tak bhi raushni ghar mein

'rais' ab bhi usi chashm-e-tar ko yaad karo