niyaz-o-naz ke jhagDon se mawara hun main

niyāz-o-nāz ke jhagḌoñ se māvarā huuñ maiñ

na mudda.ī huuñ kisī kā na mudda.ā huuñ maiñ

fuġhān-e-be-asar-o-āh-e-nā-rasā huuñ maiñ

jahān-e-ishq kī bigḌī huī havā huuñ maiñ

kisī se kar ke vafā nādim-e-vafā huuñ maiñ

ab aap apnī nigāhoñ se chhup rahā huuñ maiñ

ba-faiz-e-azm ba-zauq-e-talab ba-nām-e-ḳhudā

ḳhud aap apne safīne kā nāḳhudā huuñ maiñ

savāl-e-dīd to merā ye ehtirāman hai

kisī ke varna hijāboñ meñ ḳhud chhupā huuñ maiñ

ye zo.am-e-nāz ye nāz-e-ḳhudī ma.āz-allāh

tumhārā bas ho to kahne lago ḳhudā huuñ maiñ

dhaḌakte dil se yuuñ taktā huuñ har sitāre ko

kahā ho jaise kisī ne ki aa rahā huuñ maiñ

falak se kah do ki roke na gardisheñ apnī

ba-ḳhair huuñ zarā karvaT badal rahā huuñ maiñ

'shifā' ye rāz-e-mohabbat hai koī kyā jaane

vo mujh meñ chhup ga.e yā un meñ chhup gayā huuñ maiñ

niyaz-o-naz ke jhagDon se mawara hun main

na muddai hun kisi ka na muddaa hun main

fughan-e-be-asar-o-ah-e-na-rasa hun main

jahan-e-ishq ki bigDi hui hawa hun main

kisi se kar ke wafa nadim-e-wafa hun main

ab aap apni nigahon se chhup raha hun main

ba-faiz-e-azm ba-zauq-e-talab ba-nam-e-KHuda

KHud aap apne safine ka naKHuda hun main

sawal-e-did to mera ye ehtiraman hai

kisi ke warna hijabon mein KHud chhupa hun main

ye zoam-e-naz ye naz-e-KHudi maaz-allah

tumhaara bas ho to kahne lago KHuda hun main

dhaDakte dil se yun takta hun har sitare ko

kaha ho jaise kisi ne ki aa raha hun main

falak se kah do ki roke na gardishen apni

ba-KHair hun zara karwaT badal raha hun main

'shifa' ye raaz-e-mohabbat hai koi kya jaane

wo mujh mein chhup gae ya un mein chhup gaya hun main