نظام جبر کی ظلمت پہ سنگ باری ہے

نظام جبر کی ظلمت پہ سنگ باری ہے

گزر ہی جائے گی مانا کہ رات بھاری ہے

بناؤ شوق سے اپنے مکان شیشے کے

مخالفوں کو مگر شوق سنگ باری ہے

غم زمانہ غم زندگی غم جاناں

سلگ رہے ہیں خیالات جنگ جاری ہے

ہر ایک شے پہ تسلط ہے زرپرستوں کا

غریب لوگوں کی قسمت میں اشک باری ہے

یہ قاتلوں کی سمجھ میں کبھی نہیں آیا

ہماری آج ہے تو کل تمہاری باری ہے

سنا ہے اپنے شبستاں سے چل پڑی ہے صبا

سحر کب آئے گی ہر دل میں بے قراری ہے

جو ان کو دیکھا تو رویا بھی مسکرایا بھی

شررؔ یہ جذبہ محبت کا اضطراری ہے