nochti hain mujhe karb ki chyunTiyan

nochtī haiñ mujhe karb kī chyūñTiyāñ

sāqiyā sāqiyā talḳhiyāñ talḳhiyāñ

maiñ kahāñ aa gayā har taraf hai yahāñ

bad-gumāñ sā.atoñ kā bhayānak dhuāñ

haiñ ye anfās yā hai papīhe kī raT

pheñk aa.uuñ samā.at ko jā kar kahāñ

ek lamha azal ek lamha abad

sirf do sā.atoñ kī hai ye dāstāñ

maiñ vo īzā-kash-e-fikr huuñ aaj tak

jo uḌātā rahā apnī hī dhajjiyāñ

sab dalīleñ haiñ makkār chehre paḌho

jin pe hone kī jhunjhlāhaTeñ haiñ ayaañ

mil ga.ī mujh ko ThanDī nadāmat shikast

kaash mil jaa.e ab manzil-e-rā.egāñ

jism kī ūñchī dīvār aa phāñd kar

kuchh to kāmil kareñ qissa-e-ḳhūñ-chakāñ

jab bhī chāhā koī nazm us par likhūñ

ḳhud-ba-ḳhud thartharāne lagīñ ungliyāñ

ab hai ye haal tanhā.ī ḳhud chīḳhe hai

al-hafīz al-hafīz al-amāñ al-amāñ

maiñ samundar se apne taqābul meñ gum

chand bachche the chunte rahe sīpiyāñ

shādī 'hamdūn' hai qurbatoñ kī jazā

har qadam hādse har nafas imtihāñ

nochti hain mujhe karb ki chyunTiyan

saqiya saqiya talKHiyan talKHiyan

main kahan aa gaya har taraf hai yahan

bad-guman saaton ka bhayanak dhuan

hain ye anfas ya hai papihe ki raT

phenk aaun samaat ko ja kar kahan

ek lamha azal ek lamha abad

sirf do saaton ki hai ye dastan

main wo iza-kash-e-fikr hun aaj tak

jo uData raha apni hi dhajjiyan

sab dalilen hain makkar chehre paDho

jin pe hone ki jhunjhlahaTen hain ayan

mil gai mujh ko ThanDi nadamat shikast

kash mil jae ab manzil-e-raegan

jism ki unchi diwar aa phand kar

kuchh to kaamil karen qissa-e-KHun-chakan

jab bhi chaha koi nazm us par likhun

KHud-ba-KHud thartharane lagin ungliyan

ab hai ye haal tanhai KHud chiKHe hai

al-hafiz al-hafiz al-aman al-aman

main samundar se apne taqabul mein gum

chand bachche the chunte rahe sipiyan

shadi 'hamdun' hai qurbaton ki jaza

har qadam hadse har nafas imtihan