nok-e-shamshir ki ghat ka silsila yun pas-e-aina kal utara gaya

nok-e-shamshīr kī ghaat kā silsila yuuñ pas-e-ā.ina kal utārā gayā

merī pahchān ke aks jitne bane koī zaḳhmī huā koī maarā gayā

ġhair-mahsūs rastoñ se aatī rahī ik sadā vāpsī kī mire kaan meñ

goyā gūñge ishāroñ kī dahlīz par mujh ko āñkhoñ se us din pukārā gayā

ye na pūchhe koī mausam-e-rañg kī pahlī pahlī adāvat ne kyā dukh diye

phuul kī aag par shab guzārī ga.ī ḳhaar kī nok par din guzārā gayā

aaj us ke lahū kī har ik buuñd ke zard hone pe ḳhushiyāñ manā.ī ga.iiñ

kuchh dinoñ pahle jis rahnumā ke liye chāñd tāroñ se rasta sañvārā gayā

aap pī pī ke lamhoñ kī sab bārisheñ zindagī ke makāñ par barastī rahīñ

is liye to pighal kar mire jism kī saarī miTTī ga.ī saarā gaarā gayā

vo jo ūñche mahal the mire sāmne ġhaur se un ko dekhā to mujh par khulā

kin manāroñ se chāñdī churā.ī ga.ī kin manāroñ se sonā utārā gayā

nok-e-shamshir ki ghat ka silsila yun pas-e-aina kal utara gaya

meri pahchan ke aks jitne bane koi zaKHmi hua koi mara gaya

ghair-mahsus raston se aati rahi ek sada wapsi ki mere kan mein

goya gunge ishaaron ki dahliz par mujh ko aankhon se us din pukara gaya

ye na puchhe koi mausam-e-rang ki pahli pahli adawat ne kya dukh diye

phul ki aag par shab guzari gai KHar ki nok par din guzara gaya

aaj us ke lahu ki har ek bund ke zard hone pe KHushiyan manai gain

kuchh dinon pahle jis rahnuma ke liye chand taron se rasta sanwara gaya

aap pi pi ke lamhon ki sab barishen zindagi ke makan par barasti rahin

is liye to pighal kar mere jism ki sari miTTi gai sara gara gaya

wo jo unche mahal the mere samne ghaur se un ko dekha to mujh par khula

kin manaron se chandi churai gai kin manaron se sona utara gaya