numu ke faiz se rang-e-chaman nikhar sa gaya

numū ke faiz se rañg-e-chaman nikhar sā gayā

magar bahār meñ dil shorishoñ se Dar sā gayā

jafā-e-dost bahut sāzgār aa.ī hai

ḳharāb ho ki ye dil aur kuchh sañvar sā gayā

na jaane bād-e-sabā kyā payām laa.ī thī

ki phuul hañs to diyā phir bhī muñh utar sā gayā

ba-faiz-e-shauq ye din dekhnā nasīb huā

ki sar se dard kā tūfāñ guzar guzar sā gayā

tilism-e-bazm fusūn-e-jamāl sehr-e-shabāb

nigāh-e-shauq kā dāman guloñ se bhar sā gayā

vo shaam ho ga.ī mansūb un kī yaad ke naam

charāġh jal sā gayā dāġh-e-dil ubhar sā gayā

vo ek shoḳh kā andāz-e-guftugū 'tābāñ'

jigar meñ tanz kā nashtar utar utar sā gayā

numu ke faiz se rang-e-chaman nikhar sa gaya

magar bahaar mein dil shorishon se Dar sa gaya

jafa-e-dost bahut sazgar aai hai

KHarab ho ki ye dil aur kuchh sanwar sa gaya

na jaane baad-e-saba kya payam lai thi

ki phul hans to diya phir bhi munh utar sa gaya

ba-faiz-e-shauq ye din dekhna nasib hua

ki sar se dard ka tufan guzar guzar sa gaya

tilism-e-bazm fusun-e-jamal sehr-e-shabab

nigah-e-shauq ka daman gulon se bhar sa gaya

wo sham ho gai mansub un ki yaad ke nam

charagh jal sa gaya dagh-e-dil ubhar sa gaya

wo ek shoKH ka andaz-e-guftugu 'taban'

jigar mein tanz ka nashtar utar utar sa gaya