nuqush-e-rahguzar-e-shauq sab miTa dena

nuqūsh-e-rahguzar-e-shauq sab miTā denā

rahī hai jaañ so use bhī kahīñ gañvā denā

rah-e-hayāt meñ har moḌ par hai ik uljhan

bichhaḌ na jā.ūñ kahīñ dosto sadā denā

ġhubār-e-vaqt ne dhuñdlā diye haiñ is ke nuqūsh

zarā charāġh-e-mohabbat kī lau baḌhā denā

sunā hai shahr meñ phir aa gayā hai vo qātil

mile to dosto merā pata batā denā

talab to karnā mirī umr-e-rā.egāñ kā hisāb

hisāb tūl-e-shab-e-hijr kā chukā denā

nuqush-e-rahguzar-e-shauq sab miTa dena

rahi hai jaan so use bhi kahin ganwa dena

rah-e-hayat mein har moD par hai ek uljhan

bichhaD na jaun kahin dosto sada dena

ghubar-e-waqt ne dhundla diye hain is ke nuqush

zara charagh-e-mohabbat ki lau baDha dena

suna hai shahr mein phir aa gaya hai wo qatil

mile to dosto mera pata bata dena

talab to karna meri umr-e-raegan ka hisab

hisab tul-e-shab-e-hijr ka chuka dena