nutq palkon pe sharar ho to ghazal hoti hai

nutq palkoñ pe sharar ho to ġhazal hotī hai

āstīñ aag se tar ho to ġhazal hotī hai

hijr meñ jhuum ke vijdān pe aatā hai nikhār

raat suulī pe basar ho to ġhazal hotī hai

koī dariyā meñ agar kachche ghaḌe par taire

saath saath is ke bhañvar ho to ġhazal hotī hai

muddat-e-umr hai matlūb riyāzat ke liye

zindagī bār-e-digar ho to ġhazal hotī hai

lāzmī hai ki raheñ zer-e-nazar ġhaib o huzūr

donoñ aalam kī ḳhabar ho to ġhazal hotī hai

qaab qausain kī armān-e-payambar kī qasam

husn chilman ke udhar ho to ġhazal hotī hai

haath lagte haiñ falak hī se mazāmīñ 'afzal'

dil meñ jibrīl kā par ho to ġhazal hotī hai

nutq palkon pe sharar ho to ghazal hoti hai

aastin aag se tar ho to ghazal hoti hai

hijr mein jhum ke wijdan pe aata hai nikhaar

raat suli pe basar ho to ghazal hoti hai

koi dariya mein agar kachche ghaDe par taire

sath sath is ke bhanwar ho to ghazal hoti hai

muddat-e-umr hai matlub riyazat ke liye

zindagi bar-e-digar ho to ghazal hoti hai

lazmi hai ki rahen zer-e-nazar ghaib o huzur

donon aalam ki KHabar ho to ghazal hoti hai

qab qausain ki arman-e-payambar ki qasam

husn chilman ke udhar ho to ghazal hoti hai

hath lagte hain falak hi se mazamin 'afzal'

dil mein jibril ka par ho to ghazal hoti hai