nur-e-mah-e-asmani aur hai

nūr-e-māh-e-āsmānī aur hai

dāġh-e-dil kī zau-fishānī aur hai

jab kalī koī khilī aa.ī sadā

chand din kī zindagānī aur hai

surḳh aañsū haiñ ye jām-e-chashm meñ

ye sharāb-e-arġhavānī aur hai

ishq meñ tesha-zanī chaltī nahīñ

kohkan ye pahalvānī aur hai

dair-o-ka.aba ke jahāñ parde nahīñ

vo makān-e-lā-makānī aur hai

ai falak tujh meñ kahāñ thā ye shu.ūr

us sitamgārī kā baanī aur hai

abr-e-bārāñ meñ kahāñ sailāb ye

chashm-e-giryāñ kī ravānī aur hai

zindagī jis se ki ho zer-o-zabar

vo nigāh-e-dil-sitānī aur hai

rāh-e-ulfat meñ jo ho jaa.e shahīd

vo hayāt-e-jāvedānī aur hai

ek haiñ sab kāfir-o-momin yahāñ

mai-kadā kī hukmarānī aur hai

shā.irī se uns-e-nāhaq ho gayā

merā pesha ḳhāndānī aur hai

aur bhī yuuñ to suḳhan-dāñ haiñ bahut

terī 'jauhar' ḳhush-bayānī aur hai

nur-e-mah-e-asmani aur hai

dagh-e-dil ki zau-fishani aur hai

jab kali koi khili aai sada

chand din ki zindagani aur hai

surKH aansu hain ye jam-e-chashm mein

ye sharab-e-arghawani aur hai

ishq mein tesha-zani chalti nahin

kohkan ye pahalwani aur hai

dair-o-kaba ke jahan parde nahin

wo makan-e-la-makani aur hai

ai falak tujh mein kahan tha ye shuur

us sitamgari ka bani aur hai

abr-e-baran mein kahan sailab ye

chashm-e-giryan ki rawani aur hai

zindagi jis se ki ho zer-o-zabar

wo nigah-e-dil-sitani aur hai

rah-e-ulfat mein jo ho jae shahid

wo hayat-e-jawedani aur hai

ek hain sab kafir-o-momin yahan

mai-kada ki hukmarani aur hai

shairi se uns-e-nahaq ho gaya

mera pesha KHandani aur hai

aur bhi yun to suKHan-dan hain bahut

teri 'jauhar' KHush-bayani aur hai