nur ki barish ho yun dil ki gali mein ek bar

nuur kī bārish ho yuuñ dil kī galī meñ ek baar

kaash Takrā.eñ vo mujh se tīrgī meñ ek baar

haj bhī kar to jazba-e-ishq-o-vafā ke saath kar

ishq bhī haj kī tarah kar zindagī meñ ek baar

phir huā yuuñ us kā ġham mere gale hī paḌ gayā

lag gayā thā vo gale yuuñ hī ḳhushī meñ ek baar

zindagī-bhar ke ġhamoñ meñ ik hī ġham hogā aziim

paidā hotā hai mujaddid ik sadī meñ ek baar

de chukā tark-e-ta.alluq ke ishāre vo mujhe

guftugū meñ bārhā aur ḳhāmoshī meñ ek baar

ham bhī haiñ stage par maujūd lekin ai 'nabīl'

ham ko laayā jā.egā bas raushnī meñ ek baar

nur ki barish ho yun dil ki gali mein ek bar

kash Takraen wo mujh se tirgi mein ek bar

haj bhi kar to jazba-e-ishq-o-wafa ke sath kar

ishq bhi haj ki tarah kar zindagi mein ek bar

phir hua yun us ka gham mere gale hi paD gaya

lag gaya tha wo gale yun hi KHushi mein ek bar

zindagi-bhar ke ghamon mein ek hi gham hoga azim

paida hota hai mujaddid ek sadi mein ek bar

de chuka tark-e-talluq ke ishaare wo mujhe

guftugu mein barha aur KHamoshi mein ek bar

hum bhi hain stage par maujud lekin ai 'nabil'

hum ko laya jaega bas raushni mein ek bar