nur nur zehnon mein KHauf ke andhere hain

nuur nuur zehnoñ meñ ḳhauf ke añdhere haiñ

raushnī ke peḌoñ par raat ke basere haiñ

shahr shahr sannāTe yuuñ sadā ko ghere haiñ

jis tarah jazīroñ ke pāniyoñ meñ Dere haiñ

niiñd kab mayassar hai jāgnā muqaddar hai

zulf zulf añdhiyāre ḳham-ba-ḳham savere haiñ

dil agar kalīsā hai ġham shabīh-e-īsā hai

phuul rāhiba ban kar ruuh ne bikhere haiñ

ishq kyā vafā kyā hai vaqt kyā ḳhudā kyā hai

in latīf ḳhemoñ ke saa.e kyuuñ ghanere haiñ

zauq-e-āgahī bhī dekh tauq-e-be-kasī bhī dekh

paañv meñ haiñ zanjīreñ haath meñ pharere haiñ

hū-ba-hū vahī āvāz hū-ba-hū vahī andāz

tujh ko maiñ chhupā.ūñ kyā mujh meñ rañg tere haiñ

toḌ kar had-e-imkāñ jā.egā kahāñ irfāñ

raah meñ sitāroñ ne jaal kyuuñ bikhere haiñ

fahm laakh suljhā.e vahm laakh uljhā.e

husn hai haqā.eq kā kyā ḳhayāl mere haiñ

ham to Thahre dīvāne bastiyoñ meñ vīrāne

ahl-e-aql kyuuñ 'ḳhālid' pāgaloñ ko ghere haiñ

nur nur zehnon mein KHauf ke andhere hain

raushni ke peDon par raat ke basere hain

shahr shahr sannaTe yun sada ko ghere hain

jis tarah jaziron ke paniyon mein Dere hain

nind kab mayassar hai jagna muqaddar hai

zulf zulf andhiyare KHam-ba-KHam sawere hain

dil agar kalisa hai gham shabih-e-isa hai

phul rahiba ban kar ruh ne bikhere hain

ishq kya wafa kya hai waqt kya KHuda kya hai

in latif KHemon ke sae kyun ghanere hain

zauq-e-agahi bhi dekh tauq-e-be-kasi bhi dekh

panw mein hain zanjiren hath mein pharere hain

hu-ba-hu wahi aawaz hu-ba-hu wahi andaz

tujh ko main chhupaun kya mujh mein rang tere hain

toD kar had-e-imkan jaega kahan irfan

rah mein sitaron ne jal kyun bikhere hain

fahm lakh suljhae wahm lakh uljhae

husn hai haqaeq ka kya KHayal mere hain

hum to Thahre diwane bastiyon mein virane

ahl-e-aql kyun 'KHalid' pagalon ko ghere hain