nur tha jitna jahan mein sab hunar aankhon ka tha

nuur thā jitnā jahāñ meñ sab hunar āñkhoñ kā thā

jo bhī dekhe Duub jaa.e vo asar āñkhoñ kā thā

niiñd mujh ko le ke aa.ī thī tumhāre ḳhvāb tak

aur us ke baa'd to ḳhālī safar āñkhoñ kā thā

mo.ajiza hone se pahle sab kī āñkheñ band thiiñ

chāhte sab dekh lete Dar magar āñkhoñ kā thā

ek chehra thā jo ham chāroñ pahar dekhā kiye

do pahar nīñdoñ ke the aur do pahar āñkhoñ kā thā

ḳhvāb kā dariyā thā bahtā niiñd ke peḌoñ tale

ik safīna husn kā thā aur bhañvar āñkhoñ kā thā

jin ke sapne hī nahīñ the log vo āzād the

jo asīrī meñ rahe un par asar āñkhoñ kā thā

yaar mizhgāñ meñ chhupā rakkhe the maiñ ne ḳhat sabhī

us ne to sab paḌh liyā vo nāma-bar āñkhoñ kā thā

mujh 'musāfir' ko bahut haiñ ḳhvāb kī tārīkiyāñ

shaam hote hī ga.e ghar haañ vo ghar āñkhoñ kā thā

nur tha jitna jahan mein sab hunar aankhon ka tha

jo bhi dekhe Dub jae wo asar aankhon ka tha

nind mujh ko le ke aai thi tumhaare KHwab tak

aur us ke ba'd to KHali safar aankhon ka tha

moajiza hone se pahle sab ki aankhen band thin

chahte sab dekh lete Dar magar aankhon ka tha

ek chehra tha jo hum chaaron pahar dekha kiye

do pahar nindon ke the aur do pahar aankhon ka tha

KHwab ka dariya tha bahta nind ke peDon tale

ek safina husn ka tha aur bhanwar aankhon ka tha

jin ke sapne hi nahin the log wo aazad the

jo asiri mein rahe un par asar aankhon ka tha

yar mizhgan mein chhupa rakkhe the main ne KHat sabhi

us ne to sab paDh liya wo nama-bar aankhon ka tha

mujh 'musafir' ko bahut hain KHwab ki tarikiyan

sham hote hi gae ghar han wo ghar aankhon ka tha